Spaar makliker, sonder uitstel

Om geld te spaar is soms makliker gesê as gedaan, veral met begrotings wat ál hoe meer knyp. ’n Paar eenvoudige aanpassings kan dalk help, volgens kenners.

Hierdie veranderinge kan nóú gemaak word, omdat uitstel tot groter bekommernisse sal lei.

Maak dit ’n prioriteit om jouself te betaal

Die heel beste wenk om geld te spaar, is waarskynlik om jouself eerste te betaal. Mik daarna om minstens 10% van jou inkomste voor belasting te spaar.

As jy aan jou spaargeld dink soos aan enige ander rekening, sal jy verseker dat spaar ’n gewoonte word en begin jy daardie noodfonds of spaarpot opbou.

’n Goeie manier om jouself te dwing om te spaar, is om die proses te outomatiseer. Stel ’n debietorder op sodat ’n sekere bedrag geld aan die begin van elke maand direk vanaf jou inkomste na ’n aparte spaarrekening oorbetaal word.

Begin om jou besteding dop te hou

Net deur dop te hou waar jy jou geld spandeer, sal jy heel moontlik begin om minder geld uit te gee. Begin deur neer te skryf hoeveel geld jy daagliks bestee en watter debietorders in plek is, sodat jy jou huidige bestedingsgewoontes kan bepaal.

Besluit dan watter uitgawes noodsaaklikhede is, en watter luukses. Onthou, jou noodsaaklikhede kom eerste. As daar ekstra geld oor is nadat jy ’n voorafbepaalde bedrag gespaar het, kan jy dit aan jou luukses bestee.

’n Template (wat jy gratis op Microsoft kan kry) kan jou help om jou begroting dop te hou en te bestuur.

Hersien mediese fonds- en versekeringspolisse, asook bankkoste

Jy kan moontlik duisende rand per jaar spaar deur jaarliks jou mediese fonds, versekering en bankkoste te hersien en beter tariewe te onderhandel of rond te kyk vir beter aanbiedinge.

• Dit is die moeite werd om beter tariewe te probeer onderhandel of rond te kyk vir beter aanbiedinge op:
• mediese fonds
• huisversekering (werk ook jou huishoudelike inventaris by en hersien dit om oorversekering te vermy)
• motorversekering (aangesien die markwaarde van jou motor elke jaar daal)
• bankkoste, insluitend fasiliteit- en kredietkoste (moenie huiwer om te vra oor die verskillende produkte wat aangebied word en hoe fooie saamgestel word nie)

Jy kan ook koste verminder deur ander banke se OTM’s te vermy en, waar moontlik, vir outomatiese rekeningbetalings aan te meld om laatfooie te voorkom.

Verminder telefoonkoste

Let vir ’n paar dae op hoeveel tyd jy op jou foon spandeer, hou rekord van die oproepe wat jy maak en die data wat jy gebruik. Ondersoek dan of jy die beste moontlike pakket het.

Oorweeg ook om jou foon vir sekere tydperke van die dag af te skakel, en verwyder enige toepassings wat data gebruik sonder dat jy daarvan bewus is. Dié besparings kan tot honderde rand beloop.

Let op jou motoruitgawes

Gereelde instandhouding van jou motor verseker dat dit langer hou en kan help om groot kostes drie of vier jaar later te vermy.

Suid-Afrikaners bestee tans meer van hul salarisse aan brandstof as meeste ander nasionaliteite. Doen dus wat jy kan om jou brandstofkoste te verminder.

Spaar byvoorbeeld brandstof deur:

• roetes te beplan en take te kombineer om die aantal ritte te verminder
• jou motor volgens die aanbevole tussenposes te laat diens (maar vergelyk pryse vir ’n goeie aanbod)
• wielsporing te laat nagaan en bande op die optimale druk te hou
• vensters toe te hou tydens ritte om lugweerstand te verminder
• onnodige items uit die kattebak te verwyder
• spoed laag te hou om windweerstand te verminder
• lugversorging spaarsamig te gebruik

Bestuur jou kruideniersuitgawes

Sodra jy jou maandelikse begroting uitgewerk het, sal jy weet hoeveel jy aan kruideniersware kan bestee. Hou by hierdie limiet deur maaltye vooraf te beplan, ’n inkopielys te maak en alles in een uitstappie te koop.

Beperk die duur en aantal inkopietogte om versoekings en onnodige besteding te vermy.

Wees ook versigtig maar bedag op spesiale aanbiedinge. Dit kan nuttig wees as dit produkte is wat jy in elk geval sou koop, maar dit kan ook tot impulsiewe aankope lei.

Jy kan spesiale kruideniersaanbiedinge aanlyn dophou, byvoorbeeld by:

• Food Lovers Market
• Checkers
• Pick n Pay
• Shoprite

Verminder elektrisiteitsuitgawes

Eskom se elektrisiteitspryse het tussen 2007 en 2022 met 653% gestyg. Dit verteenwoordig ’n toename vier keer hoër as inflasie oor dieselfde tydperk, wat 129% was. Met voortgesette beurtkrag en nasionale kragtekorte gaan die prys van elektrisiteit net een kant toe – op!

In hierdie konteks maak dit sin om waar moontlik jou verbruik te verminder. Jy kan jou elektrisiteitskoste verminder deur eenvoudige wenke soos die volgende te volg:

• Beperk hoe gereeld jy die yskas oopmaak en maak dit so gou moontlik weer toe
• Skakel oor na energiedoeltreffende gloeilampe
• Koop toestelle met hoë energiedoeltreffendheidsgraderings wanneer dit tyd is om te vervang
• Verlaag die temperatuur van jou geiser tot 55°C of laer en oorweeg ’n tydskakelaar
• Skakel TV’s, toestelle en ligte af wanneer dit nie gebruik word nie
• Isoleer jou huis behoorlik om verwarmings- en verkoelingskoste te verminder
• Was en spoel vol vragte klere en gebruik koue water waar moontlik

Betaal kredietkaartskuld af

Kredietkaartskuld kan emosioneel uitputtend wees. Staak dus kredietkaartbesteding en fokus daarop om skuld een kaart op ’n slag af te betaal. Rangskik kaarte volgens rentekoerse, van hoogste na laagste, en betaal eers die kaart met die hoogste koers af.

Betaal elke maand soveel as moontlik en probeer meer as die minimum paaiement betaal om rente te verminder.

Skakel oor na ’n gesonder leefstyl

Almal het nou en dan ’n bederf nodig! Dit is egter wanneer jy dit verskeie kere per week of elke dag begin doen, dat dit ’n groot hap uit jou beursie neem (en moontlik jou gesondheid benadeel).

Sekere slegte gewoontes is duurder as ander, soos byvoorbeeld om te rook. Dieselfde geld daaglikse alkoholiese drankies, soetgoed en duur cappuccino-gewoontes. Om hierdie gewoontes te staak, kan oor ’n jaar aansienlike besparings meebring.

Jy kan ook kwalifiseer vir laer lewensversekeringspremies en op die lang termyn verskeie siektes vermy.

Betaal ekstra in op jou huislening

Om selfs net ’n paar honderd rand ekstra per maand op jou verband te betaal, kan:

• Die totale rente wat jy betaal aansienlik verminder
• jou terugbetalingstydperk verkort

Gebruik ’n aanlyn bybetalingsakrekenaar om ’n rowwe idee te kry van hoeveel jy oor die lang termyn kan spaar deur ekstra in te betaal. Let daarop dat die werklike bedrag deur die spesifieke voorwaardes van jou lening beïnvloed sal word.

Leer eenvoudige selfdoen-vaardighede aan

Vir sekere huis- en motorinstandhoudingstake is dit die beste om dit aan professionele persone oor te laat.

Maar, met soveel inligting wat aanlyn beskikbaar is, is daar egter baie take wat jy self kan uitvoer teen ’n baie laer koste as wat ’n kontrakteur sou vra.

As jy nie daarin slaag om ’n probleem self op te los nie, kan jy altyd ’n spesialis kontak.

Wees geduldig met jouself

Dit is onwaarskynlik dat jy 100% van die tyd ’n streng begroting sal kan volg, maak nie saak hoe gedissiplineerd jy is nie.

Bly realisties, vergewe jouself vir klein foute en bou af en toe ’n bederf in jou begroting in. Só verseker jy dat jy in die regte ingesteldheid bly om so gou moontlik weer op koers te kom.

Bronne:

lamna.co.za