Lanorma-aartappels: Van toewyding tot tafel
Die geliefde aartappel is ʼn alombekende voedselbron in huishoudings reg oor Suid-Afrika en die stille held van menige maaltyd. Maar agter elke heerlike gebraaide skyfie skuil ʼn storie van toewyding en kundigheid.
GWK is die eksklusiewe verspreider van die Lanorma-aartappelkultivar in SA – die land se vierde mees gewilde kultivar. GWK Aartappels verkoop nie die aartappels self nie, maar wel die aartappelmoere wat deur kommersiële boerderye geplant word vir die verbruikersmark.
Een van dié boerderye is Boomplaas naby Reitz in die Oos-Vrystaat.
Dié boerdery word sedert 1856 bedryf en Niklaas Lourens, die vierdegeslagboer, is tans daar aan die stuur. Hy boer ook met vleisbeeste, Bonsmaras, mielies, en sojabone, maar aartappels vorm sedert 1965 ʼn groot deel van die plaas se besigheid. Hy het in 2016 Lanorma spesifiek begin plant, en vandag is dit die grootste kultivar wat hier aangeplant word.
Met ʼn diep liefde vir die aartappelbedryf geniet Lourens veral die dinamika van bemarking en bestuur van die uithaalproses. “Die dinamika van aartappelboerdery is uniek,” vertel hy. “Geen ander bedryf is so hands-on soos aartappels nie.”
Die effektiewe bestuur van die uithaalproses is van uiterste belang om skade aan die aartappels te voorkom, verduidelik hy. Dit is byvoorbeeld noodsaaklik om te verseker dat die aartappels nie te veel sonlig kry nie, aangesien sonbrand die gehalte van die produk kan skade doen.
Met die nuwe seisoen voor die deur is daar natuurlik verwagtinge en uitdagings. Terwyl projeksies dui op ʼn oorvoorraad van tweede- en derdegraadaartappels, wat moontlik prysafname kan veroorsaak, bly Boomplaas positief en fokus op volhoubaarheid in ʼn wisselvallige mark. Die bemarking van aartappels vereis deeglike koördinasie, verduidelik Lourens, juis aangesien markomstandighede en pryse so wisselvallig kan wees.
Presisieboerdery neem ʼn sentrale plek in die moderne landbou. Die vermyding van onnodige verspilling van hulpbronne, soos oormatige bemesting, is van kardinale belang, asook die keuse van die regte kultivars.
Wat maak Lanorma-aartappels spesifiek dus so spesiaal vir Boomplaas?
Lanorma is ʼn goed aangepaste kultivar, ook vir droëlandtoestande, verduidelik Lourens. Sy dieper wortelstelsel maak hom ook oor die algemeen beter bestand teen siektes. Lanorma by Boomplaas het ʼn hoë uitpakpersentasie – gemiddeld 88% tot 92% eerste grade oor die afgelope vyf jaar. Dit beteken ook dat daar min swakker grade is om te bemark of weg te gooi en vergemaklik die bemarkingsproses.
Vir die verbruiker is Lanorma aantreklik weens sy kleur, kwaliteit, bakgehalte en smaak.
En dus, van GWK se moere tot die droë grond van die Vrystaat, kan jy nou sien daai lekker diepgebraaide skyfies op jou bord kom ʼn lang pad.
Geniet hulle!
