Hoender lekker genoeg vir ʼn verloofring

Sê nou maar van sosiale media wat jy wil, die resep-juwele is oneindig. Een so ʼn resep is die gewilde marry me-hoender, wat glo só lekker is, dat jy dadelik gevra sal word om te trou as jy dit voorsit. Hierdie weergawe van Delish is maklik, vinnig en lekker. 

Bestanddele: 

• 3 eetlepels olyfolie, verdeel 

• 4 ontbeende hoenderborsies, vel verwyder 

• Sout 

• Varsgemaalde swartpeper 

• 2 knoffelhuisies, fyn gekap 

• 1 eetlepel vars tiemieblare 

• 1 teelepel rooipepervlokkies 

• ¾ koppie lae-sodium hoenderaftreksel 

• ½ koppie songedroogde tamaties, gekap 

• ½ koppie room 

• ¼ koppie fyn gerasperde Parmesaan 

• Vars basiliekruidblare vir opdien 

Aanwysings: 

1. Voorverhit die oond op 190°C. Verhit een eetlepel olie in ʼn groot, oondvaste pan oor medium hitte. Geur die hoender mildelik met sout en peper en braai in die pan tot goudbruin – ongeveer 5 minute per kant. Plaas die gebraaide hoender in ʼn bord.
2.  In dieselfde pan, verhit die twee oorblywende eetlepels olie oor medium hitte. Roer die knoffel, tiemie en rooipepervlokkies by. Braai tot geurig – ongeveer 1 minuut. Roer die aftreksel, tamaties, room en Parmesaan by; geur met sout. Laat prut en plaas hoender (en enige vloeistof wat uit die hoender gekom het) terug in die pan. 
3. Plaas die pan in die oond. Bak die hoender tot deurgaar – die vloeistof moet deurskynend wees as die hoender met ʼn mes geprik word – ongeveer 10 – 12 minute. 
4. Rangskik op ʼn bord. Skep die sous oor. Garneer met basiliekruid. 

Wenke: 

• Pasta is ʼn goeie keuse om saam met die hoender te bedien. 

• Baba-spinasie kan by die roomsous gevoeg word vir bykomende geur. 

*Bron en foto’s: delish.com